Dezde la ekspulsion de Espanya asta la desizion nazista de eksterminarlos,los Djudeo-Espanyoles,kultivaron, sus lingua i sus tradisiones i se enrikesieron de las kulturas de los paizes ande fraguaron sus komunidades.
.Aferrados por la tormenta de akeya eksterminasion nazista, los Djudeo-Espanyoles komo otras komunidades evropeas, se toparon konfrontados kon la veluntad de eksterminasion tanto de los benadames komo de sus kulturas.
En realidad, de los 350.000 Djudeo-Espanyoles ke bivian alrededor de la mar Mediterranea en 1939, mas de la mitad fueron asasinados por los nazistos i sus kolaboradores.
Akel karar fue muncho tiempo  kuvierto por la emportansia de la Shoah i sus 6 miliones de viktimas, entre eyas, 75.00O Djudios de Fransia.
Portanto mos paresio emportante de aklarar oy, siendo ke konosemos mijor los mekanizmos de Destruktion, la suerte de esta komunidad minoritaria ama biva i dinamika de Fransia i de Evropa entre las dos gerras. De ningún modo se trata aki de diferensiar o de estableser una yerarkiya entre las viktimas de la Shoah.
Al kontrario,estamos konvensidos de ke el estudio de lo partikular yeva a un mijor entendimiento de lo jeneral i esperamos ke la bushkida sovre la suerte de los Djudeo-Espanyoles  yevara a un mijor konosimiento del djenosidio de los Djudios de Fransia.

Para luchar kontra el olvido, transmeter i abediguar la memoria, siete asosiasiones djudeo-espanyolas,Aki Estamos, Al Syete, Centre communautaire Don Isaac Abravanel, Judéo Espagnol A Auschwitz (JEAA), UISF (Union des Israélites Sépharades de France), Vidas Largas, Vidas Largas Marseille, desidieron en 2010 de fondar la asosiasion Muestros Dezaparesidos.

En serka alkansaremos la primera etapa de muestro proyekto kon la publikasion del Memorial de los deportados Djudeo-Espanyoles de Fransia.
Esta obra kontendra, ademas de la lista detalyada de mas de 5000 deportados djudeo-espanyoles, artikolos de kontekstualizasion i testimonios ke mereseran ser munchiguados, enrikesiendo ansi muestra estoria. Tal es el eskopo del sitio ke prolongara la obra del Memorial, sitio ke esperamos avrir a las famiyas, a sus desendientes  a los investigadores i tambien a todos los ke dezean luchar kontra el olvido, las informasiones  los testimonios i los retratos ke no podiayan ser publikados en la version papel.
Este sitio es evolutivo, ira enrikesiendose apokapoka kon los adelantamientos de le la investigasion,  el deskuvrimiento de dokumentos i testimonios i de kontribusiones ke kada uno i uno podra dar.